الاخبار

بابكر سلك : الديمقراطيون يفوزون

17views

] ولأن ترمب همجي وغوغائي.
] خرج من قلوب الأمريكان مع أول دورة.
] وحتى في أمريكا بلد الديمقراطية يوجد همج حاولوا إفشال العملية الديمقراطية بالبلطجة وكده.
] ولأنه لايصح إلا الصحيح.
] إنتصرت الديمقراطية على الهمج وعلى ترمب.
] وفاز بايدن الديمقراطي.
] وهتف الشارع الأمريكي.
] ميلانيا أم جضوم الليلة مابتنوم.
] وهتف الشباب في وجه ترمب.
] ياعنصري ياجبان كل الدول سودان.
] أيها الناس.
] فوز الديمقراطيون بأمريكا له مابعده.
] فهم يحترمون الإنسان وحقوقه ومنظماته.
] ويجيدون خلق العلائق الطيبة تبادلاً مع الآخرين.
] والآخرين ديل الزينا كده.
] وأعتقد أن فوزهم في هذا التوقيت في مصلحة الثورة وديمقراطية السودان.
] برغم أنو في ناس محسوبين على السودان مابحبوا الديمقراطية.
] لكن يسووا شنو الله غالب.
] الماعاجباهو ديمقراطية في السودان يشرط جوازو السوداني لو كان بره البلد.
] أو يشوف ليهو سمبك يتخارج بيهو بره لو كان جوه البلد.
] فالسمبك يشبه الفكرة.
] فكرة رفض الديمقراطية لو سميناها فكرة.
] المهم .
] مدني لو أدى العيش لخبازو.
] وخبازو أكل نصو.
] أخير لينا من أكل النيم ده ياحمدوك.
] الوعد كان.
] حكومة كفاءات.
] لا كفوات.
] وفشل القيادة المدنية هذه لن يعيدنا لعهود العسكر وحكم البندقية.
] ولكن ممكن يكلفنا مرقة خفيفة للشارع.
] نشكل حكومة مدنية جديدة يامدني. ونعود إلى حيث النكهة.
] إلى حيث الواجب من خلال أو مع لجان المقاومة.
] أها
] قالوا سوداكال أخيراً تذكر أنو الكورة الإفريقية قربت.
] قام أعلن بداية للإعداد.
] بس ماورانا إعداد نفسي ولا بدني ولا فني.
] ودي إحدى خرمجات السيد سوداكال.
] والعيب بتاع الخرمجة ده وارد من أي رئيس علاقتو بالرياضة حبة قريشات لملمها .
] لملمها من وين ده ماموضوعنا.
] فالأندية الرياضية (طشاتة)كبيرة لغسيل وتنظيف الأموال المتسخة .
] لكن يشهد الله سودا ماشفناهو غسل في المريخ. لأنو أساساً ما ورانا مال عشان نعرفو مال نضيف ولا متسخ.
] لكن الدايرين نقولوا لسودا .
] مجالس المدينة تتحدث عن مؤامرة.
] ولكن ثق تماماً.
] لن نسمح لك ببيع الديمقراطية التي ساندناها بكامل قوانا العقلية.
] ولن نسمح لك بالتفريط في القانون .
] ولا بإهدار النظام الأساسي الأساسي.
] فان كانت لك تحالفات تقوم على إهدار مكتسبات تعبنا لتحقيقها.
] بالله بعيداً عن ديمقراطيتنا.
] فنحن بايدنيون أكتر من بايدن ذاتو.
] أيها الناس.
] إن تنصروا الله ينصركم.
] أها
] نجي لي شمارات والي الخرتوم .
] كان شفت يا والينا بتاع الفرن نقول ليهو دايرين عيش اسطوبة يدينا.
] العيشة (إن وجدت) من جوه أصفر من الدخن يا والينا.
] ومن برة فسخ وجلخ وكريم أساس مابواسي جضومها لينا.
] والعيشة أم عشرة لبة مافيها يا والينا.
] قول لمدني يعمل ليها لبة وبخمساشر يبيعها لينا.
] أخير من تكون ملساء من بره فاضية من جوة زي بت أم لعاب يا والينا.
سلك كهربا
ننساك كيف والكلب قال الليلة والليلة بايدن فاز.
وإلى لقاء
سلك

الانتباهة

Leave a Response