المقالات

ملاح الجبوري يكتب …….ملاحات …..كوشيب

443views

ملاحات (434)
ملاح محمد بشير الجبوري
123102717. 912247358

زمان لمن الواحد يسمع له اغنية وطنية شعر جلده دا بقيف شعرة شعرة؛ ياخي الاغاني و الاناشيد الوطنية دي كانت بتعمل فينا عمايل النجار في الخشب ما سواها؛ النجار ولا الكبار؟
الكبار دا شنو يا ملاح الدين؟ ياخي انتو مالكم ما ناقشين كدة؟ مش الزول البنجر الحطب اسمه نجار؟
و الزول البجزر البهايم اسمه جزار؟
بسكم الكبار دا الزول البكبر الشجر؛ يا شجرنا كبروه جنس كبير و انحنا مركزين مع الشد و الجزب بين المدنين و العسكرين و لمن نرجعوا لصوابنا بنلقوا غاباتنا بقن صحراء،؛ ياخي العالم شغال زراعة تقيلة و شتل جد؛ و انحنا شغالين قطع و حفر، و طبعا حفر لحفر بفرق؛ ناسنا التشفوهم فوق ديل اي واحد فيهم راقد له في راي، و اي واحد متدبي للتاني؛ هسه كلاموا كي (كوشيب) دا براه قنع من خيرٍ فيها و طعن المحكمة دي كوكابية؟ لو تحول كوشيب من متهم إلى شاهد فهنا معناتو وراء الشغلانة في إنّ و دا بؤكد ظنوني، ياخي ناسنا ديل زي اللاعبين (حريق) اي زول لاعب صالح ورقه و لو اتحيت له اي فرصة بنزل 130 و بخلي الباقين معنقلين زي جريوات التبلدي؛ ياخي يومتى لقيت مقال بتكلم عن فوائد التبلدي استغربت والله، المقال طلّع ليك من القنقليز الف حاجة، و ما حاجات ساكت بل علاجات و كمان لامراض مستعصية؛ ياخي لو بدلنا حفرنا لبعض دا بحفر الارض و تخضيرها لوصلنا غايتنا في زمن محدود؛ عندنا ناس حفارين بواكلن بس؛ و العجب الشتالين ياخي ديل زي مكنات شتل النجيلة؛ الواحد بيعرف كيف يكب السم في الدسم؟ و العجب لو بقى زول كبير شوية و ملم بشوية معلومات ياخي بدل يسخر معلوماته لمنفعة البلد و الوطن يقوم يسخرها لمصالحه و اسرته و معتقداته؛ يا ناس مافي تاريخ بنبني الان، و الجعجة الاسفيرية دي ما بتغيير فيك حاجة، و الواتس اب عمره ما صنع قائد ولا حيصنع شي؛ ياخي بستغرب جدا لمن القى ناس في قروب واتس اب يقرروا ليهم في امر قبيلة او امر وطن؛ و بصل من الاستغراب مرحلة الاندهاش لمن يقولوا لي عندنا اجتماع في القروب الفلاني عشان نعمل للعلانيين ديلك كذا و كذا؛ يا عمك الفضاء الاسفيري كله واحد و اسهل شي انك تخترق قروب لتتحصل على معلوماته؛ فاي شي يدار هناك معناته لابدة و فسيتها برة؛ فلمن يواجهوك بصوتك ابقى قدرها و ما تقابض الرغو؛ ياخي مالو ما يكون هدفنا واحد هو الوطن و بس و تحركنا الاغاني الوطنية زي زمان؛ فبدل ( قنبلة حلاة الزول في الطول و العلا) نطرب لي ( نطرى نجوانا و حبنا العزري و الوفاء مغروس فينا من بدري) و بدل ( الطاغية الامريكان) نردد ( سامشي رافعا راسي؛ بارض النبل و الطهر؛ و من تقديس اوطاني حبا في دمي يجري)
الأوطان تبني بالحفر و الشتل و لكن ما زي حقنا دا!! شتل حقيقي بدل النيم و شجر الزينة دا تعالوا نغرسوها منقة و تبلدي و شوفوا لو تاني زول قدر يلوي يدنا؟؟؟

خالص ودي
ملاح محمد بشير الجبوري
molaha1976@gmail.com
ابوزبد يونيو 2020

Leave a Response