المقالات

ملاحات …..ملاح الجبوري…..الاسد الكتل نورا

316views

ملاحات (428)
ملاح محمد بشير الجبوري
123102717. 912247358

مرة و انحنا صغااااار كنا سارحين بي بهايمنا؛ و الوقت داك المسافات ما اتقاربت زي دا؛ ياخي ( الحماميض) الهسه بقن جوا السواني ديل؛ زمان لمن تنش غنمك و توصلهن الشمس بتكون لحقت صنقور السماء ؛ الزمن داك دا زمن ظهور السلاح و مع صوت السلاح طبعا البراعص الكبار كبار ديلك بقن مافشات؛ و الناس الكبار كانوا بونسونا بالسنة القتل فيها الاسد (نورا) ؛
و السنة الغارن فيها المرافعين الفريق الفلاني؛
و الزمن الفيه التقولا شقن الحلة نهار؛
انحنا لمن قمنا ما لقينا المفترسات ديل لكن لمن نسيروا خريف و نوصلوا المخارف و نكونوا ساريحين بالغنم فعادي مرات بنلقوا الغزالة سارحة جوا المراح؛ على الرغم من ان الحيوانات المتوحشة كانت بتشكل خطر على حياة الانسان الا ان انتشار السلاح فقّدنا حيوانات تاني ما بتتعوض؛ سبحان الله؛ زمان انا عملت حلقة في اذاعة غرب كردفان عن انتشار السلاح و خطره و لابد من نزعه؛ فبعد الحلقة دي باقل من سنة صدر قرار بنزع السلاح؛ و في ناس كثاااااااااار السلاح مهم عندهم؛ لاموني و اتهموني باني السبب الأساسي في منع السلاح، كذلك انا من زمان كتبت و قارنت بين مرتب الموظف و الاسعار؛ و كتبت عن عدم ايفاء المرتب باقل الاحتياجات؛ كتبت و كتبت و كتبت كي لمن تقول روحي دي تمرق؛ و لمن صانعي القرار سمعوا لكلامي و زادوا المرتبات زيادة غير مسبوقة؛ و المستفيدين استلموا مرتباتهم قالوا ( شكرا حمدوك)،
كلام عجيب!!!! ملاح دا كتب لمن اصابعينه بققن زول ساكت بنوع الكشكرة يقول لي يا ملاح قلمك جاب مافي؟ صحي ( الخيل تجقلب و الشكر لحماد)،
طيب لشنو وقت وقفوا السلاح حملتوني اللوم؟ و وقت زادوا المرتبات شكرتم حمدوك؟ ولا ( الخير لي علية و الشر لي هنية؟)
اها انحنا اليوم داك نشينا بهايمنا و ناوين نسرحوا في محل مافي زول سرح فيه قريب دا؛ عارفننا ماشين وين؟ سارحين في ( ام حطبة) عديل،
طبعا ام حطبة دي من السواني و تطلع صعيد تخلي (دميرة الشيخ ملاح) بي يمينك و (قردود جهنم) بي يسارك؛ و طبعا المحل دا ضيق و الزراعة و الهشاب متزربقاتنه من كل الجهات؛ فاي دقسة بتتملص منك بهيمة نايبة زي ( قماش) ولا ( دباس) بتخش في زرع ابوي ( محمد سعيد) ولا ابوي ( بشير ابو السماني) ربنا يرحمهم؛ و خبرنا بجيبنه فزاعات الحطب؛ عشان نعبر بسلام من مضيق جبل طارق دا اتبعنا خطة محكمة و دقيقة و قدرنا اجتزناه بامتياز بقيادة كبيرنا (ملاح ديبس)، و طبعا بعد المعبر بتجيك ( الرمتة) ثم ( الرميتة)؛ و بعد داك ام حطبة؛
دي اول مرة اشوف فيها ام حطبة؛ و كان الوقت في نهاية الخريف و بداية الدرت، ياخي ام حطبة دي شجرها كبااااار و ظليل من دخلناها اتفارقنا مع الشمس؛
الموية في الخيران بيضاااا لمن تشوف قعر الخور؛
و القش اخضررررر ياخي بهايمنا ديل رتعن التقول نرتعوا معاهن؛
يتبع
خالص ودي
ملاح محمد بشير الجبوري
molaha1976@gmail.com
ابوزبد مايو 2020

ليصلك كل جديد انضم لقروب الواتس آب


Leave a Response